Mela la Meigim Kriol Strongbala jinggabat Werl Transleishin Dei

La det yiya 2017, detmob la United Nations bin tok Septemba 30 im garra bi Werl Trensleishin Dei. Det dei, im bla ebribodi bla jinggabat haumeni langgus wi garrim iya la dis werl en hau detmob hu dum trensleiting, alabat brabli importen pipul dumaji alabat album pipul andasten gija en bi fren gija. Ola blekbala trensleita, alabat iben mowa importen, dumaji oni fyu pipul dum detkain wek en dumaji alabat gibit sapot la blekbala langgus wen ebrijing im mosli Ingglish oldei.

Rid det stori brom United Nations bla dijan Werl Trensleishin Dei: https://www.un.org/en/observances/international-translation-day

Mela iya la Meigim Kriol Strongbala, mela dum diskain trensleishin wek na. Mela dum olkain, laik album pudum infameishin la Kriol bla det Krounabairis, laik pudum buk la Kriol bla biginini mob, en bla trensleidim difrendifren stori bla gabmenmob. If yu la Dawin la Oktoba, yu gin gaman en irrim mela la NT Writers’ Festival bla det trensleishin wek mela dum. Trai luk: https://www.ticketebo.com.au/translation-two-ways.html bla mowa infameishin.

Kipgon ridrid bla mowa stori bla ola trensleishin wek mela dum.

Trensleiting la 2020 - det yiya bla Krounabairis

2020 im nogudwan yiya bla ebribodi. Wen wi bin irrimbat det nyus det siknis imin stat en imin spred ebriweya kwikbalawei, wal ebribodi bin wori mijel na. En pipul bin jinggabat, ola Krounabairis infameishin shud bi la Kriol en ola najamob langgus so pipul gin andasten. Det wek ola trensleida mob, imin brabli importen wek na. Rait akros Kriol kantri, mela bin luk difren oganaiseishin en difren pipul wekwek bla pudum ol difren Krounabairis stori la Kriol. Mela bin hepi bla pudum ol det wek la mela websait bla ebribodi bla luk. Ol detlot infomeishin, im gin stil album yu tudei.

Luk la ola Krounabairis infameishin gada Kriol iya: https://meigimkriolstrongbala.org.au/rop/coronavirus-information-in-kriol/

Trensleiting bukmob en Bigismob Jigiwan Dog

Seim taim det Krounabairis bin gamat, mela iya la Meigim Kriol Strongbala bin dumbat wanbala fanwan projek. Mela bin wek gada det buk kampani neim Allen & Unwin en det tubala hu bin raidim det buk gulum Too Many Cheeky Dogs. Mela bin album alabat pudum det buk la Kriol en mela bin gulum Bigismob Jigiwan Dog. Wen Bigismob Jigiwan Dog bin gamat, imin importenwan dumaji imin festaim eni bigwan buk kampani bin trensleitim Ingglish buk la eni blekbala langgus. Afta imin gamat, mela bin gudbinji bla luk hau ola biginini bin leigim det buk en hau meni pipul bin baiyim det buk. Det buk kampani bin ran aut na en dei garra meigim mowa kopi!

Yu gin baiyim Bigismob Jigiwan Dog la mela onlain shop en from najamob shop du. Mela bin meigim sambala friwan risos bla album pipul sabi mowa bla det buk.

Dumbat trensleishin bla difrendifren oginaiseishin

Oni lilbit mela iya Meigim Kriol Strongbala dumbat trensleishin job bla najamob oginaiseishin bat im importenwan det job. Im album najamob weya dei wandim det Ingglish stori garra bi la Kriol. Dijan im importen dumaji if yu wandim intepreta, yu rait - NT Gabmen garrim interpreta sebis. Bat bla trensleishin (weya yu garra raidimdan), im gin bi brabili hadwan bla faindim sambodi bla album yu. Dis yiya, mela bin dum trensleishin bla loda difren oginaiseishin: NLC, Ropa Golf Shaiya, Katherine Taun Kaunsil, Djilpin Arts la Beswick, WWDA (Wumen gada Disibiliti Ostreilya) en Menzies Skul ob Helth en alabat projek bla Hepataitis B. En det mani mela gajim brom dismob job, im album mela bla gro en im album bildimap wi komunidi.

Rid mowa stori bla trensleidimbat Kriol iya: https://meigimkriolstrongbala.org.au/en_au/resource/translation-services-for-kriol/

Bla mela websait gada Ingglish en Kriol

Wen mela bin stat dijan Meigim Kriol Strongbala la 2019, mela bin wandi meigi websait du. Det websait im bla sherim nyus en stori bla Kriol bat im bla gibit pipul ol difren risos en infameishin bla Kriol du. Mela bin jinggabat, im gud aidiya bla meigim det websait gada Ingglish en Kriol mijimet. So, ebri taim mela pudum samting la dijan websait, mela pudum gada Ingglish en Kriol du. Det tubala batin la top weya im tok English en Kriol - if yu klikim det batin im ternimran dijan websait la det najawan langgus. Mela gudbinji du, det dijan websait im gibit pipul mowa Kriol stori bla ridrid en im pudum mowa Kriol la intanet.

Yu gin bulurum mela la Feisbuk, Twita en Instagrem en mela oldei pudum stori gada Kriol jeya du.

Trensleidimbat songmob en bukmub bla biginini la Ngukurr FaFT

Iya la Ngukurr, Meigim Kriol Strongbala dumbat difren Kriol lesen, laik hau ebri wik mela gu la det pleigrup bla ola mami en beibi la Ngukurr gulum FaFT (FaFT im min 'Families as First Teachers'). La Ngukurr FaFT, mela album ola mamiwan pudum sambala gudwan song en buk la Kriol - en mela abum loda fan du seimtaim. Laik hau mela bin trensleidim det stori gulum Det Brabli Jigibala Beya en mela bin dum ekting na.Mela bin trensleidim sambala song la Kriol en ola beibi leigim. Yu gin luk en irrim tubala song iya: https://meigimkriolstrongbala.org.au/rop/kriol-songs-with-ngukurr-faft/. En geman maitbi neks yiya, mela garra dum CD na, garrim ola Kriol song bla biginini! Wen mela dum diskain wek, im album biginini len gudwei en jinggabat hau bla rid gudwei, dumaji im oldot la Kriol en Kriol im det oni langgus dei sabi.

The FaFT Mums have been busy translating both picture books and songs to Kriol so that young children can have access to…

Posted by Ngukurr Families as First Teachers la Tuesday, 22 September 2020

 

Iya la Meigim Kriol Strongbala, mela jinggabat ola trensleida ebriweya la werl dumaji im Werl Trensleishin Dei. Ola wek dei dum, im brabli importen wek tharran. Mela laigim mijel du det mela lilwan pat ob dijan wek. Det trensleishin wek, im hepin ol oba dis werl en im album pipul tok gija en andasten gija iben wen dei gaman brom difrendifren kantri.

Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.

Bulurum Mela

Scroll to Top
Gubek la top