Jigibala Beya stori imin laibwan wen Ejukeishin Minista bin kaman bla bisit

Bla kapula manth, mela la Meigim Kriol Strongbala bin gu jeya ebri wik la Families as First Teachers (FaFT) la Ropa bla album ola mami en weka jeya bla trensleitim wanbala buk la Kriol. Det stori dei bin pik im Det Brabli Jigibala Beya brom Nick Bland. Det stori im bla fobala enimul hu bin hambag wanbala beya antil wanbala enimul bin jinggabat hau bla meigim det beya gudbinji.

Bla trensleitim djian stori imin loda wek and imin trikiwan. Bla sambala mami imin nyu ting bla alabat. Imin hadwan du. Sambala Ingglish wed nobodi bin sabi, laik hau dei gulum det hon det Musi garrim 'antlers' en hau wen det beya shoum im tuth, thei bin yusum det wed 'gnashing'. Imin trikiwan du dumaji sambala pipul jeya nomo bin ridrid Kriol matj bifo.

Bambai na, afta mela bin gugubat jeya eberri wik, mela bin binijimap det trensleishin en detlot mami bin geding yustu ridimbat det stori. Imin isi bla mela bla dalim alabat den, bla jandap en dum ekting bla det stori en meigim ola enimul la det stori laibliwan. Wen dei bin dalim mela Indigenous Literacy Foundation en NT Minista bla Ejukeishin Selena Uibo garra bisit bifo skul holidei, imin tjens bla mela bla showof bla mela nyuwan Kriol stori - nomo Det Brabli Jigibala Beya - nau mela gulum det stori Det Brabli Jigibala Beya.

Wen mela bin jandap en dum, imin loda fan. En imin meigim mela gudbinji bla luk hau FaFT la Ropa, Ropa Skul en det Ejukeishin Minista ol bin tok hau riding en raiting gada Kriol im impotant ting. En ola biginini en femili bin laigim du. Thenggyu la ebribodi hu bin sapotim dijan proujek en la Indigenous Literacy Foundation (ILF) du. Bla mela trensleishin, im pat ob det Book Buzz progrem ILF garrim, weya dei album eni blekbala komunidi bla trensleitim buk bla biginini la alabat oun langgus en meigim kopi laiga brabli buk bla alabat.

 

 

Bulurum Mela