Bla faindim trensleita bla Kriol

Maitbi yu o yu wek lugubat sambodi bla trensleitim samting brom Ingglish la Kriol en yu wandim help. Mela gin album yu. Bat yu garra jinggabat du - wen yu askim sambodi bla dum Kriol trensleishin bla yu, im trikiwan bla Kriol en najamob blekbala langgus. Nomo laik ola obasis langgus weya thei gin dum kwikwan. Bla trensleitim samting la Kriol, im gin bi slowan lilbit en maitbi diyawan lilwan. Maitbi oni fyu pipul sabi dum detkain wek. Bat if yu dum, im gin bi brabli gudwan bla ola Kriol spika.

Wen yu trensletim samting brom Ingglish la Kriol im gudwan dumaji:

  • Im album mela ola Kriol spika mob sabi brabliwei wanim yu dalimbat mela
  • Mowa pipul garra joinin la yu projek
  • Im shoim mela ola Kriol spika mob yu rispek mela en hau mela lib
  • Im gibit job, treining en mani la detmob dumbat trensleishin wek

Najawei, if munanga nomo dum trensleishin o thei dum nogudbalawei, im gin bi mowa wes. Kapula nyus stori toktokbat bla dijan:

Dijan sain gada Kriol en Ingglish

Im gin bi had bla munanga bla faindim oginaiseishin hu gin dum trensleiting. Dismob na gin album alabat:

  • Melabat iya la Meigim Kriol Strongbala gin dum trensleishin. Mela jidan la Ropa. Tok la mela bla help.
  • ARDS Aboriginal Corporation – https://ards.com.au/ - alabat jidan la Dawin en gin dum du maitbi
  • Bla detmob la Kimbili eriya, trai tok la detmob la Aboriginal Interpreting WA - http://aiwaac.org.au/

Najamob maitbi gin dum trensleishin bla munanga, bat munanga garra maindim hu thei askim bla dum trensleishin. Bla dum trensleishin, yu garra abum treining en ikspiriyens. Munanga shud faindim sambodi garram ikspiriyens bla dum trensleishin, jis laik thei shud faindim dijmawan pipul enitaim thei lugubat sambodi bla dum speshulwan job. Sambala munanga mait reken 'aa det sambodi im tok Kriol en Ingglish. Im gin dum trensleishin'. Bat najing. Im kaan dum gudwei if im nomo sabi hau. O maitbi la im job im shud konsentreit la wanim im poustu du.

Bla mowa stori bla dumbat trensleishin

Munanga gin kontek la det trensleishin oginaiseishin en gibit alabat det stori thei garrim. Det oginaiseishin gin dalim det munanga haumatj im kos bla dum det job. Det oginaiseishin maitbi gin dum rikoding du if det munanga wandim, so im gin pudum det trensleishin la reidiyo o bidiyo. Det munanga shud oni gibit det stori wen det fainul stori. If im fiksimapbat mowa afta imin gibit, im meigim mowa wek bla det trensleita.

If det munanga bin jendim longwan stori bla trensleitimbat, maitbi det trensleita garra pudum la isiwan Ingglish fes, bifo im pudum la Kriol. Wen im dum lagijat, im digimat ola trikiwan wed en ola wed nomo garrim matj mining or garrim faniwan mining. Wen yu raidim detkain stori garra isiwan Ingglish, im gudwan du, dumaji mowa pipul gin andasten.

Afta det munanga bin bulurum ol det mob, wi gin dum det Kriol trensleishin na. Ola trensleita shud abum ikspiriyens en maitbi wek wansaid la linggwis weya im garram ikspiriyens du. Samtaims, det trensleita maitbi lafta askim mowa kwesjin la det sambodi hu wandim det trensleishin, so im gin meiksho im sabi eberrijing la det stori brabliwei. Wen det trensleishin, im finish, im gin jendimbek en maitbi im garra dum natha lil job du, laik tok det stori en rikodim la kompyuta.

Yu garrim samting la Ingglish en yu wandi pudum la Kriol? Tok la mela en mela gin trai album yu!

Bulurum Mela

Scroll to Top
Gubek la top