Carol Robertson im 65 yiya ol en imin lib la Ropa ol im laif. Im olgamen en tjetj lida en garram bigis femili - siksbala bignini en 13 gagu en abuji. Det olgamen bin du loda ting la im laif. Imin album pudum det Baibul la Kriol, im lida la tjetj en dei bin meigim im minista du. Wal dis yiya, imin dum nyuwan ting na - im garram im oun buk! Bat nomo enikain buk - im speshulwan dumaji det buk im garram Kriol en yu kain faindim meni Kriol buk eniweya.
Det buk bla Carol, gulum Stori bla Brutbrut en Bujigat bin gamat Febri 2023 bat rili, det olgamen bin rait det stori la 2019 wen imin fes stat wek iya la Meigim Kriol Strongbala wen imin bla mela feswan langgus weka. Brom deya, Indigenous Literacy Foundation, hu bin olredi meigim sambala Kriol buk garram detmob la Binjari, bin rid bla Carol stori en brom deya dei bin album mela meigim brabli buk. En didei na, mela hepi bla larram ebribodi sabi bla djian buk gulum Stori bla Brutbrut en Bujigat . Im faniwan lilwan stori blanga wanim hepin wen wanbala brutbrut en wanbala bujigat gu lukaran bla daga wan nait.
Bla meigim det buk sut brabliwei, mela bin gajim Karen Rogers bla dum ola pitja. Karen im sinya atis la Ngukurr Arts. Wen imin jinggabat dum ola pitja bla Bujigat en Brutbrut, imin jinggabat wen imin dum ola pitja bla im oun buk, Main Abija , weya imin gamat 2021 gada detmob la Allen & Unwin. Karen bin dum ola pitja gada wadakala en dei brabli gudwan.
Las ting mela bin lafta du bla meigim Stori bla Brutbrut en Bujigat redibala, im bla dum rikoding. Det olgamen bin pik la Anton Rami bla dum. Det Anton im nomo braiden bla diskain dumaji im plei gada Lonely Boys. Wen yu lisin la det rikoding bla Anton, im album wen yu rid det buk. Im gudwan bla enibodi hu stil lenlen Kriol o enibodi hu wandi len bla rid Kriol gudwei. Insaid la det buk, dei bin pudum QR Code en wen yu point yu fon la det QR Code im jandim yu la det rikoding. O, yu gin daunloudim det rikoding brom mela Soundcloud peij.
Didei na wi garram dijan buk Stori bla Brutbrut en Bujigat en im wanbala mowa Kriol buk enibodi gin baiyim la shop. Wi garram oni fyu buk lagijat, nomeda bigwan langgus garram gulijap 20,000 spika rait akros NT en WA. Dijan buk im gada Kriol en Ingglish la itj peij. Dumaji Carol bin gro garram dis Kriol, imin rait dijan buk gada Kriol en den afta mela bin pudum det Ingglish pat bla album detmob najamob hu nomo sabi rid Kriol rait thru.
Dis Kriol, im lilbit seim laik Ingglish bat ola Kriol spika bin tjeinjim ola saun, wed en sentens detmatj, wi tok na det Kriol im brabli langgus du na. Wen yu luk det neim bla dis buk - Stori bla Brutbrut en Bujigat. - im sho yu du. Det wed mela bin pudum bla 'mouse' - brutbrut - im speshulwan wed Ropamob yusum. Imin gaman brom sambala olwan langgus laik Marra en Ngandi. La det tubala langgus, olpipulmob bin yusum det wed 'burudburud' bla tok bla eni kainoba lilwan maus. Yu gin luk onlain en faindim detkain brutburt la det Atlas of Living Australia. Bujigat – munanga gulum 'cat' – Im Kriol wed du. Im brom det Ingglish wed 'pussycat' bat Kriol spika yusum det wed 'bujigat' ebriweya. Yu gin ibin lisin ol Geoffrey Gurrumul Yunupingu sing bla 'bujikit' la im song gulum Marrwurrumburr.
Stori bla Brutbrut en Bujigat im la ola shop na en yu gin pudum oda en baiyim la mela websait (Hadkaba, $24.99) en yu gin luk ola najamob Kriol buk deya du la mela onlain shop.
Stori bla Brutbrut en Bujigat yu gin baiyim tudei brom eni bukshop en brom mela onlain shop!
Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.