Main Abija (My Grandad)

Cover image of the children's book Main AbijaMain Abija im bla Karen oun stori bla im oun abija. Karen imin wek la Ngukurr Arts longtaim dumbat peinting - en imin rait buk na du! La det buk Main Abija, Karen im dalim stori bla im abija, laik wanim det olmen bin larnim im, wotfo imin importin olmen la im en wanim im laik wen yu garrim importin olpipul la yu laif. Det wed 'abija', ola Ropa mob yusum det wed. Yu abija im bla yu mami dedi.

‘Dijan buk gada ola memri ai bin abum gada main abija from wen ai bin lilgel til imin libu wi. Imin titjim mi loda tings bla koltja en bla kantri. Mi hepi ba pasim det stori la main femili en bla pudum la dis buk.’

.

Karen Rogers sharing Main Abija with students at Ngukurr School

Karen bin dum ola pitja du en dei brabli purdiwan. Imin wek la Ngukurr Arts longtaim na en imin dum atis kos la Batchelor du. (Yu gin luk ol im peinting en wek brom Ngukurr Arts iya). Dumaji im olredi sabi peinting en drodrobat, imin maitbi isi bla im bla jinggabat meigim buk bla biginini. Det buk im gada Kriol en Ingglish mijimet la ebri peij en ola atwek brom Karen du la ebri peij.

Main Abija bin gamat Matj 2021. Im gamat brom det buk kampani gulum Allen & Unwin (alabat gin bin dum det najawan buk Bigismob Jigiwan Dogbin gamat. Im Kriol trensleishin bla det Ingglish buk Yu gin irrim Karen ridridbat im stori gada Ingglish en Kriol. Klikim iya bla irrim det tubala rikoding: https://www.allenandunwin.com/main-abija. Detmob la Allen & Unwin bin raidim ting bla eni titja hu wandi yusum Main Abija la klasrum. Yu gin faindim det titja 'guide' iya: https://www.allenandunwin.com/browse/book/Karen-Rogers-Main-Abija-My-Grandad-9781760526030

Main Abija im la eni bukshop o yu gin baiyam brom mela du, la mela onlain shop.

Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.

Bulurum Mela

Gubek la top