Nyuwan-nyuwan risos: Elfabet fleshkad en wolfris

Las yiya, mela iya la Meigim Kriol Strongbala bin wekwek gada Batchelor Press bla meigim nyuwan Kriol Elfabat posta, gada ola leta en saun la Kriol. Det Kriol elfabet garrim 21 saun weya wi raidim garri wanbala leta en 14 saun weya wi raidim garri tubala leta. Det posta im braitwan gada pitjamob en wed bla album yu sabi wani saun det leta meigim. Im brabli gudwan det posta, speshli wen pipul dum Kriol lesen la skul.

Image showing a set of Kriol alphabet flashcardsMela brabli gudbinji bla luk hau detmob la Batchelor Press bin meigimbat mowa risos brom det elfabet posta. Dei bin meigim fleshkad en detkain longwan posta yu hengimap la wol, gulum wolfris. Detmob Kriol elfabet fleshkad , dei 35 braitwan kad garrim ola saun, wed en pitja mela bin pudum la det elfabet posta. Detmob fleshkad gudwan bla yusum la klasrum. Yu gin yusum detmob kad bla meigimapbat olkain geim bla bigininimob, bla album alabat len ola Kriol leta en saun, so bambai dei garra sabi rid Kriol gudwei.

Kriol elfabet fleshkad: 35 kad, lemineididwan so biginini kaan breigim. Det sais im 12.5cm x 17.5cm. Detmob kad kos $50 en yu gin baiyim brom: http://batchelorpress.com/node/400

Dijan Kriol Elfabet wolfris im du garrim ola leta, wed en pitja mela bin pudum la det feswan elfabet posta. Bat dijan wolfris, im laiga longwan posta. Im faib mita long. Yu gin hengimap la klasrum en im gudwan bla biginini bla luk enitaim dei garra jinggabat Kriol spelling. La det pitja jeya andanith, im sho sambala biginini la Ngukurr Skul stat lenlenbat det Kriol elfabet en jinggabat hau bla raidim Kriol.

Kriol Elfabet wolfris: im lemineididwan so biginini kaan breigim. Im faib mita long en 20 sentamita hai. Dei jendim la yu la tjub en im kos $50. Yu gin baiyim brom: http://batchelorpress.com/node/399

Children at Ngukurr School showing off the Kriol alphabet wall frieze

Det tubala nyuwan risos - fleshkad en wolfris - yu gin baiyim na brom Batchelor Press bla $50. En yu gin stil baiyim det feswan Kriol Elfabet posta brom Batchelor Press websait o brom mela oun onlain shop.

Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.

 

Bulurum Mela

Scroll to Top
Gubek la top