Kriol Elfabet pousta

Dijan Kriol Elfabet posta, mela bin meigim la 2019 dumaji mela bin wandim meigim braitwan Kriol posta bla hengimap la klasrum en album ebribodi bla Kriol speling. Dijan posta im shoum ola Kriol saun. Sambala saun, wi raidim gada wanbala leta, laik d bla daga. Sambala saun, wi raidim gada tubala leta, laik ny bla nyuspeipa . Wi yusum 21 leta la dis Kriol elfabet. Dis Kriol elfabet im garrim 21 saun weya yu raidim gada wanbala leta en 14 saun weya yu raidim gada tubala leta. Yu gin faindim ol detlot 35 Kriol saun iya la dis Kriol Elfabet pousta. En im garrim braitwan pitja en wed jeya bla album bla jinggabat det saun en det speling. Kipgon en luk andanith - mela bin pudum jeya ola wed mela bin pudum la dis pousta. Dijan Kriol Elfabet pousta, mela bin meigim garrim Batchelor Press. Enibodi gin baiyim from Batchelor Press websait en yu gin baiyim difren sais pousta du: http://batchelorpress.com/node/387 

Mowa stori bla dis Kriol Elfabet pousta

  • Mela bin trai faindim Kriol wed weya ebribodi sabi det wed. Bat im trikiwan dumaji Kriol im lilbit difren la ebri komuniti.
  • Dijan pousta im sut brabli ola komunidi sanrais brom Katherrain. La Kimberley eriya, olabat yusum difren speling, bat sambala la Kimberley stil sabi dis speling wi yusumbat la dis pousta.
  • Dislot na ola wed mela bin pudum la dis Kriol Elfabet pousta:
    • a – alibala – in the morning/early
    • b – bingga – hand/finger
    • d – daga – food
    • e – epul - apple (sambala tok 'apul' du maitbi)
    • f – feis – face
    • g – gel – girl
    • h – het – hat
    • i – irriwul – ear
    • j – jinggabat - think (sambala tok dis wed difrenwei du laik jinggibat, jingimbat)
    • k – kenggurru – kangaroo
    • l – lisid – lizard
    • m – mun – moon
    • n – nos - nose (sambala maitbi tok nous du)
    • o – olkain – assorted, various
    • p – peipa – paper
    • r – riba – river
    • s – sneik - snake (sambala maitbi tok sineik du)
    • t – tedul – turtle
    • u – fut – foot
    • w – wada - water (sambala maitbi tok en raidim dijan laik woda du)
    • y – yelowan - yellow (sambala raidim dijan yelawan du)
    • ai – ai – eye
    • au – klaud – cloud
    • ei – sheid – shade
    • oi – boi – boy
    • ou – roud – road
    • ng – ngarra - peek (dijan wed mousli bla Ropa mob. La Barunga, alabat tok roih du)
    • ny – nyuspeipa – newspaper
    • rr – garramap - carry (maitbi sambala raidim garrimap)
    • sh – shuga – sugar
    • th – thribala - three (sambala maitbi tok thrribala)
    • rd – bard - bird (mousli Ropa mob tok bard. La najalot komuniti, thei maitbi tok berd)
    • rl – yarlbun - lilyseed (dijan wed mousli bla Ropa mob. La Barunga, alabat tok datam )
    • rn – barn - burn (sambala maitbi tok bern)
    • tj – tjeya – chair

If yu garrim eni kwesjin bla djian Kriol Elfabet pousta, yu gin jendim mesij la mela!

Bulurum Mela

Scroll to Top
Gubek la top