Wen munangamob growap, olabat garram det "ABC" song en dei ol sabi det song olagijawan. Bla blekbalamob, wi nomo garram detkain elfabet song bla blekbala langgus. Wal, wi garram wanbala Kriol Elfabet song na, bla album ebribodi len hau bla raidimdan Kriol mowa beda. En dei bin meigim gudwan bidiyo du! Trai luk:

Det stori bla dijan bidiyo im stat 2019 wen mela iya la Meigim Kriol Strongbala bin wek garram Batchelor Press bla meigim nyuwan Kriol Elfabet Poster. Det Kriol Elfabet Poster, wi yusum olataim na la Ngukurr Skul bla album biginini o enibodi len hau bla rid en rait Kriol gudwei. Afta dei bin meigim det posta, Batchelor Press mob bin meigim fleshkad en wol fris du en yu gin baiyim la det Batchelor Press websait. If yu wandi luk ola wed wi bin pudum la det Kriol Elfabet Posta, trai luk dijan: https://meigimkriolstrongbala.org.au/en_au/resource/kriol-elfabet-poster/

Afta na, la 2021, wanbala titja la Ngukurr Skul neim Melevea bin jinggabat na bla meigim elfabet song. Det song imin meigim, imin gudwan, en det sambala brom NT Music Skul la Dawin bin wek gada Melevea. Dei bin rikodim det song en meigim bidiyo gada sjudenmob brom Ngukurr Skul. Dei bin meigim det bidiyo na en imin gamat la VAMPtv (Episode 155). Mela tok thenggyu la Huni Bolliger en najamob la NT Music School en la Melevea Huihui en najamob la Ngukurr Skul bla dijan gudwan risos. Gud job yumob!

Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.