Brom 1925, Werl Enimul Dei bin hepin ebri yiya la Oktouba 4. Werl Enimul Dei im meigim wi jinggabat hau bla maindim ola enimul gudwei en meiskho dei jidan seifwan en hepiwan. Dis yiya, wi garram tubala nyuwan bidiyo garram Kriol. Det tubala bidiyo bin gamat la Werl Enimul Dei bla meigim wi jinggabat tubala impodenwa stori bla wi komunidi en ola enimul bla wi.
Ola Beibiwan Enimul garra Jidan la Bush im det feswan bidiyo en im tok bla ola problim wi abum wen wi faindim beibiwan enimul la bush en bringimbek la kemp. Detkain beibiwan enimul gin meigim loda problim la kemp en maitbi kos loda mani. Dei laigim jidan la olabat oun femili la bush du. Dijan bidiyo bin gaman brom Roper Gulf Regional Council, en detmob la AMRRIC . Melabat la Meigim Kriol Strongbala bin album olabat pudum det stori la Kriol en dum ola rikoding.
Maidimbat Kantri - Maindimbat Bujigat (Caring for Country - Managing Cats) im tok bla bujigatmob en ola problim dei meigim la wi komunidi en la bush du. Dumaji ola bujigat bin gaman brom obasis bastam, dei bin tjeinjim loda ting la wi kantri en meigim nogud. Wen wi abum bujigat la kemp, dei gin meigim problim bla wi du if wi nomo hendlim eni problim gudwei. Dijan bidiyo bin gaman brom AMRRIC, weya AMRRIC im min Animal Management in Rural and Remote Indigenous Communities. Dijan bidiyo bin oni gada Ingglish bastam. Bat dis yiya, mela bin wek gada AMRRIC bla pudum la Kriol:
Caring for Country – Managing Cats (Kriol) brom AMRRIC la Vimeo.
Mela brabli gudbinji bla luk diskainbala risos gada Kriol, dumaji Kriol im det mein langgus yu irrim la loda komunidi la Noth Ostreilya. Mela wish dis tubala bidiyo album blekbala tok gija en jinggabat hau bla maindim gudwei ola enimul bla wi, komunidi bla wi en kantri bla wi. Mela tok 'thenggyu' la Kaylene Doust la Roper Gulf Regional Council, la Tida Nou la AMRRIC, la det meinwan trensleida bla wi, Carol Robertson, en la detmob Kriol spika hu bin tok la dis tubala bidiyo: Anton Rami, Carol Robertson, Robin Rogers, Colin Hall, Shania Miller en Angelina Joshua.
Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.