Yu gin faindim Kriol la stemp na

Wen yu luk la ol ob Ostreiliya, Kriol im oni lilwan langgus. Munanga gulum 'minority language'. Dijan im min sambala nomo reken im impodinwan langgus laik Ingglish o najamob langgus brom obasis. Ola lilwan langgus laik Kriol, munanga nomo teik notis matj. Kriol im mosli jis wani wi tok eniwei la kemp lagijat. Im not matj la skul lesen, la telebijin, la nyus, la intanet lagijat. Mela iya la Meigim Kriol Strongbala, mela trai lidimap Kriol en meigim im laiga haiwan langgus. En mela gudbinji enitaim mela luk najamob dum lagijat du. Wen pipul teik notis la Kriol en dei reken im impodinwan langgus, wal den dei garra reken enibodi hu tok Kriol impodinwan pipul du.

Dis wik, mela bin brabli gudbinji bla luk Kriol la nyuwan ting mela neba luk bifo - Kriol langa stemp!

Dijan nyuwan stemp im tok bla det 'Wi Stadi Bla Kantri' proujek brom Ropa. Det stemp gamat Mei 19, 2020.

Det stemp garra gamat Mei 19, 2020 en im shoum ting bla wanbala proujek dei bin dum bla kapula yiya gada Ropamob and gada pipul brom Makwori Yunabesidi la Sidni. Dei bin gulum det proujek Wi Stadi Bla Kantri en la det proujek dei bin dum olkain ektibidi, gada munanga saiyens en blekbala kaltja mijimet. La det proujek dei faindim nyuwan enimul en plent nobodi bin luk bifo, dei bin faindim sambala plent en enimul dei bin reken bin guwei-guwei brom det eriya, dei bin lukaftum solwada kantri en dei bin raidimdan ol difrendifren plent en enimul la Ropa eriya.

Det proujek, im la wanbala stemp na. Dei bin meigim fobala stemp, oldot bla dijan ting gulum 'Citizen Science'. Dijan im laik wen enibodi stat dumbat saiyens proujek, nomo jis detmob ekspetwan brom yunabesidi. Wanbala oganaiseishin gulum Australian Citizen Science Association bin pik fobala proujek bla pudum la fobala stemp en dei bin pik det Wi Stadi Bla Kantri proujek brom Ropa bla wanbala stemp.

Neks taim yu gu gajim yu meil o jendim leta, trai luk - maitbi det stemp im garrim Kriol la im!

Bla mowa infameishin bla dismob stemp yu gin gu la det Australia Post websait en luk det Stamp Bulletin namba 365: https://australiapostcollectables.com.au/articles/stamp-bulletin-365 

Det fobala stemp bla 'Citizen Science', alabat gamat Mei 19, 2020

Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.

Bulurum Mela

Scroll to Top
Gubek la top