Mubi Ribyu - Monsta-in-lo

Maitbi nobodi bin eba dum diskain bifo - mubi ribyu gada Kriol! Dosin Denyuls bin prektis raitraitbat Kriol en eniwei imin rait stori bla det mubi gulum 'Monsta-in-lo'. Im from 2005 det mubi en im gada Jenifa Lopes en Jein Fonda staring. Trai luk det stori brom Dosin ...

 

Sandei taim aibin jidan langa kemp lugunat mubi. Det mubi im kol Monsta-in-lo. Aibin laigim det mubi dumaji imin abum wanbala olgamen hu bin abum san. Det olgamen bin jidan hepi laif garra im san. Bambai na wan dei im san bin gu langa solwada said blanga wok. Ja na  imin faindim det gel langa solwada said bat im nomo bin dalim im mami enijing blanga det gel weya imin faindim. Afta dubala bin gubek langa kemp mamiwan bla det men bin gubek du langa kemp. Im nomo bin sabi enijing blanga im san jeya garrim im gelfren. Wen det mamiwan bin luk dubala, streidawei imin nugudbinji. Det olgamen dumaji imin reken blanga im san bla jidan lagijat nomo garrim enibodi. Det sanwan en im gelfren bin jandap la fran la det olgamen bat det olgamen nomo bin tok enijing la det gel dumaji imin brabli nugudbinji. Oni la det sanwan imin toktokbat nomo la det gel dumaji det olgamen bin jinggabat olkain langa im gabarra. Det olgamen bin libum dubala langa kitjin en imin gu insaid langa im rum toktok misal olkain en jinggabat olkain blanga hau im garra breikimat dubala bat najing. Burrum ja det gel bin askim det men “weya yu mami?”. Det men bin tok “o main mami im maitbi kolkol la ola femili” bat imin jeya insaid langa londri garrim bigwan fetha toktokbat olkain blanga det gel weya imin gulum gajin. Brom ja det olgamen bin jinggabat mijal na ‘maitbi if mi digi im langa dina ja na ai garra tok la im, blanga main san.’  En so dubala bin gu rait langa dina ja na imin toktok olkain la det gel. Dubala endap gulagula mijal jeya det olgamen bin tok tumatj. Imin buldan en gu langa hospel.

If yu luk dis mubi yu garra luk wanim garra hepen la det gajin gija. Mo pat jeya yet weya dubala bin abum guduwantaim en rafwantaim.

La mi dijan mubi imin brabli faniwan brom stat tu finish. Ai gibit dis mubi 10/10.

If yu laigim dijan stori brom Dosin en yu wandim im bla raidim stori bla najawan mubi, dalim mela iya!


Bulurum Mela

Gubek la top