Kriol Dikshinri la intanet

Yuwai, dei garrim Kriol Dikshinri orait! (rili, im Kriol-en-Ingglish Dikshinri). Ola Baibul Trensleita mob bin meigim dijan dikshinri. Dei bin meigim dis dikshinri longtaim na - la 1980s en 90s - en nobodi bin tjeinjim matj from det taim.

Bat im lilbit nogudwan du. Im nid mowa wek dijan dikshinri, so maitbi yu lafta maindim mijel lilbit wen yu yusum. Sambala lilwan problem gada dis dikshinri im:

  • Yu kaan faindim eberri Kriol wed jeya. Sambala wed nomo jeya. En sambala wed dei garrim jeya nobodi tok det wed matj.
  • Yu gin faindim Kriol spika la loda komunidi en alabat tok lilbit difren la itj komunidi. Yu gin faindim wed la dikshinri weya oni sambala yusum det wed en najalot nomo tok det wed. Bat wen yu luk la dikshinri, im nomo dalim yu brom weya ola wed bin kaman.
  • Nobodi weking la dis dikshinri na en im geding ol lilbit na.
  • Samtaims det mining dei bin pudum im rong lilbit o dei bin spelim det wed faniwei lilbit.

Bat, dijan dikshinri im stil brabli gudwan. Bla meigim diskain im brabli hadwan en imin loda wek. Mela brabli hepi alabat la AUSIL (Australian Society for Indigenous Languages) bin dum dis wek en meigim dijan Kriol-Ingglish Dikshinri.

Mela dalim pipul bla maindim mijel wen yu yusum dijan dikshinri. Mowa beda bla jidan gada Kriol spika en gajim help brom im, speshli if im sabi rid en rait Kriol insted ob jis jidan misal gada det dikshinri. Im rait bla yusum det dikshinri bla album yu lilbit. Bat im gudwan bla jidan gada Kriol spika du dumaji im album yu bla meiksho yu garrim det raitwan Kriol wed brom yu eriya. En im meiksho yu nomo kopi eni misteik brom det dikshinri la yu oun wek.

Bunjum yu garram eni kweskin o wandim help, yu gin jendim mesij la mela!

Iya na det lingk la det Kriol-Ingglish Dikshinri AUSIL bin meigim: http://ausil.org.au/Dictionary/Kriol/index-english/index.htm

Bulurum Mela

Scroll to Top
Gubek la top