50 Words gada Kriol: Jembre stail

Dijan 50 Words projek bin gamat brom University of Melbourne en im gada 50 wed gada olkain blekbala langgus brom ebriweya la Ostreilya. Dijan projek im gibit titja en enibodi tjens bla luk en lisin la ola difren blekbala langgus wi garram ol oba Ostreilya. Bigismob langgus dei bin pudum deya olredi en yu gin luk oldot la det websait dei bin meigim. Im gada mep en yu gin klikim en lisin ola difren wed en langgus: https://50words.online/.

Dis manth, dei bin pudum Kriol la det 50 Words websait du na! Thenggyu la Josie Lardy brom Jembre dumaji yu gin gu la det websait na en lisin 50 Kriol wed brom im. Detmob wed imin pudum deya, im gudwan bla enibodi hu stat lenlenbat Kriol o enibodi hu stat len bla rid Kriol. Josie bin pudum loda gudwan isiwan wed deya. Sambala wed yu gin luk im seim laik Inggalish, laik det wed ni en wada en den najamob wed weya det Kriol wed im difren brom Inggalish laik yuwai en gabarra Josie bin pudum sambala gudwan sentens deya du, laik wani na - im lilbit laik wen munangamob tok 'hello' - en gaman iya .

Josie en det 50 Words bin meiksho bla dalim wi det 50 wed dei bin pudum deya, im brom Jembre (Jilkminggan). Dumaji Kriol im difren la ebri komunidi so im gud bla wi bla rimemba samtaims det wed im maidi difren wen yu gu la difren komunidi.

Trai luk yuself en gu la det 50 Words websait - Jilkminggan wei!https://50words.online/

Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.

Bulurum Mela

Scroll to Top
Gubek la top