Ngandi and Ngalakgan Plants and Animals

Ola koltjurul nolij bla ola plent en enimul ola Ngandi en Ngalakgan olpipul bin sabi, im iya la dis buk. Det nolij imin gaman brom olabat olpipul en na im la dis buk gada loda infameishin en 292 peij. Im garrim loda pitja la dis buk du. Bla meigim dijan buk, olpipul bin wek mijamet gada munanga laik linggwis en reinja. Mijamet dei bin pudumdan ola nolij en stori en na dijan buk gulum Ngandi and Ngalakgan Plants and Animals im brabli impodenwan buk.

Ngalakgan langgus im bla det kantri na weya Ngukurr komunidi jidan tudei (en im det kantri du weya mela iya la Meigim Kriol Strongbala jidan). Ngandi im lilbit seim laik Ngalakgan en Ngandi kantri im jidan noth brom Ngukurr. Tudei la Ngukurr, pipul oldei tok Kriol, bat det tubala language Ngandi en Ngalakgan - dubala brabli impodenwan langgus bla loda pipul la Ngukurr.

Wanbala olgamen, imin dum loda wek bla dis buk - ol Mrs C Daniels OAM. Bobala, imin pasawei 2019 bifo dijan buk bin gamat. Det olgamen en najamob olpipul wandim olabat nolij bla kantri, plent en enimul bla kipgon. Dijan buk, Ngandi and Ngalakgan Plants and Animals , im meiksho det nolij brom olpipul gin kipgon la ola nyu jenereishin. Dijan buk im tok bla 249 difren plent en 291 difren enimul. Im garrim infameishin bla difren sisen, ola wed bla difren kainoba kantri, bla ola ting olpipul bin oldei meigim, lagijat. La det buk, dei bin pudum ola Kriol neim en munanga neim bla ola plent en enimul du, en sambala infameishin bla det tubala langgus Ngalakgan en Ngandi. Loda foto en drowing jeya du la det buk - bla 126 difren plent en 137 difren enimul.