If yu nomo bin luk Lil J en Big Cuz bifo, dubala blekbala lilboi en lilgel wanbala 5 yiya ol en najawan 9 yiya ol. Dubala stap garra dubala gagu en Ol Dog. Dei bin la telibishin la ABC, SBS en NITV tjenul from 2017, ranamakbat la dubala skul, komuniti en kantri oba tubala awod winning sisen. En na, Lil J en Big Cuz en dubala fren en femilimob garra len Kriol.

Wal. Madi lilbit.

Laik dat Inggalishwan Lil J en Big Cuz, dei bin dum garra najamob blekbala langgus du. Dat fes tubala sisen garra blekabala langgus laik Arrente, Walpiri, Djambarrpuyngu en Pitjantjatjara, yu gin luk oldat iya SBS on Demand. Dis yiya, Sisen 3 ba Lil J en Big Cuz garra kamat en - wansaid la dat Inggalish patmob - im garra abum nyuwan patmob garra difrindifrin blekbala langgus eb dis taim, im garra abum Kriolwan du!

Meigimbat Kriol patmob bla Lil J en Big Cuz

Dat fes bigwan ting ba meigimbat Kriol pat ba Lil J en Big Cuz im ba transleitim brom Inggalish la Kriol. Imbin digim kapula manths, bat wi bin binijimap en wi gadim tubala wek redibala na!

Dis nomo bin onli big ting ba mela, bat mela bin askim ola biginini la skul bla album mela du. Ngukurr Skul en Meigim Kriol Strongbala bin pikimat difrin yang pipul brom ola bigwan bigwan klas. Mela nomo bin trai diskain ting bifo. Ba ola yang pipul, im bin brabli gudwan taim ba prektis olabat Kriol riding en raiting skills en hau ba andasten Inggalish en Kriol. Imbin gudwan ting ba ola yang pipul ba leigim mijal ba sabi tubala langgus.

Ba tok bla wani wek ola yang pipul bin dum, olabat bin bringimap nyuwan wei la Kriol. Hu beta ba rait Kriol stori ba yang pipulmob ranamakbat garra Kriol den Kriol yang pipul mob gin? Laik dat wanbala pat ja garra yang pipulmob la pleigraun gulagula mijal ba mabul geim. - sumting lagijat ola skul kids mob olredi sabi en danja gin album olabat ba wani ba tok en im fil riliwan la ebribodi.

Ol dat trensleishin pat bla dis wek, madi 12 yang pipul bin wek ba trensleishin, olabat dumbat 300 lines la Kriol - brabli ditjma wek dan!

Gaman traimat mijal! Wandi bi bois la dat sho?

Wal dat tubala pat im finish na, mela redi ba dat neks ting - rikoding na! Datmob hu bin dum Lil J en Big Cuz garra jandi tim iya la Ropa ba album garra dat rikoding, bat wi wandim Ropamob ba gaman en rikodi mijal bois ba ebribodi la dat Lil J en Big Cuz sho. Dat first pat dei gulum kasting, weya enibodi gin go en traimat mijal. Dis garra hepin iya la Ropa on 30th of Orgis en wi wandi ebribodi ba kaman en traimat mjial.

Brom ja, olabat garra pik sumbala pipul ba dum dat rikoding ba dat sho fo ril na dan. Ba Ropamob hu dei bin pik ba bi wanbala bois la dat sho, olabat garra girrim moni ba dat wek.

Afta dat rikoding im finish, datmob hu bin meigim Lil J en Big Cuz garra gubek en joinamap dat rikoding garra dat piktja en meigim dat sho. En madi dis yiya en neks yiya, En wi gin luk Lil J en Big Cuz garra Kriol!

Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.