Dei garram bigismob stori bla yangpipul hu bin gwin la Don Deil en nogudbala ting bin hepin la alabat jeya. Don Deil im det pleis la Darwin laiga jeiyil bla biginini en yangpipul. Nothin Teritri Gabmen im bos bla det Don Deil. Bambai na, loiyamob bin lisin detmob stori bla wanim bin hepin la yangpipul insaid la Don Deil en dei bin gu la kot na. Detmob loiya bin dalim jaj la kot det NT Gabmen bin breigim lo wen ola nogudbala ting bin hepin la Don Deil. Im hepining la det Don Deil la Alice Springs du. NT Gabmen bin lisin la detmob stori en dei bin tok dei garra pei kompinseishin mani la detmob yangpipul en tok sori.
Dijan bin hepin longtaim na - brom 2006 raitap 2017. Bat didei na, loiyamob lugabat ol detmob yangpipul hu bin gwin la Don Deil det taim dumaji NT Gabmen garra pei alabat kompenseishin mani. Detmob loiya la Maurice Blackburn Lawyers lugabat ebribodi hu bin gwin la Don Deil enitaim brom Ogis 2006 raitap Noubemba 2017 so dei gin sherimat det kompenseishin mani gudwei. Dijan im bla enibodi hu bin gwin la det Don Deil la Alice Springs du.
Iya la Meigim Kriol Strongbala, mela bin faindaut bla dijan wen detmob loiya bin askim mela bla trensleitim det leta bla detmob loiya. En dei bin askim mela bla meigim rikoding du. Mela bin tok mijel im brabli impordenwan ting en mela wandi ebribodi bla sabi. If yu garram femili hu bin gwin la Don Deil enitaim brom 2006 raitap 2017, dalim alabat bla kol la Maurice Blackburn Lawyers la 1800 226 211. Yu gin gu la alabat websait du, gibit yu neim jeya en faindaut mowa stori: https://www.mauriceblackburn.com.au/class-actions/current-class-actions/nt-youth-justice-class-action/ . Yu garra kol la detmob loiya bifo Noubember 16, 2021.
Bla irrim dijan stori, presim plei iya:
Dijan na det leta mela bin pudum la Kriol bla detmob loiya:
Dijan leda im burru Maurice Blackburn Lawyer mob. That Federal Court ob Australia bin dalim dat Maurice Blackburn Lawyer mob bla sherim dijan stori gada yu. Dijan stori im bla ola yang pipul weya alabat bin guwin langa Don Deil la Darwin o det najawan Don Deil la Alice Springs.
That Maurice Blackburn Lawyer mob, alabat wekwek gada Munanga lo. Alabat bin nyal bla tubala blakbala la wanbala kot keis. That kot keis im agens NT Gabmen. Langa dijan kot keis, tubala blakbala, Dylan Jenkings en Aaron Hyde, dubala bin tok that NT Gabmen bin breigi lo en NT Gabmen bin ardim yang pipul wen dei bin jidan la Don Deil. Bat dat NT Gabmen reken dei nomo bin breigi dat lo.
That Aaren en Dylan dubala bin aski NT Gabman bla peiyim compensation mani la ola yang pipul weya thei bin jidan la Don Deil. So, det NT Gabmen bin tok yuwai bla gibit compensation mani la yu. NT Gabman reken yu na bin guwin la Don Deil.
If yu wandi gaji that compensation mani brom gabmen, yu garra gibit yu neim la detmob loiya. Wen yu gibit yu neim, munanga gulum ‘register’. Wen yu ‘register’ im min yu dalimbat that loiya mob yu wandi that compensation mani. Bla register en gibit yu neim, yu gin kol la that loiya mob. O yu gin gu la that loiya mob websait en burrum bla yu diteil ja. Dijan na that websait: https://classaction.mauriceblackburn.com.au/NTYouthJustice/registration
Dijan na that namba bla kol that loiya mob: 1800 226 211. Im fri kol dijan.
Meiksho yu gibit yu neim bifo 16 November 2021. If yu nomo gibit yu neim la that loiya mob, yu gaan gaji eni compensation mani.
Bla faindat mo bla dijan stori, yu gin kol la that loiya mob en tok garra alabat. That loiya mob gin gaji inteprita wen alabat toktok gada yu. If yu wandi irrim dijan stori, yu gin irri rikoding garra Kriol en najamob langgus langa alabat websait. Iya na that loiya mob websait: mauriceblackburn.com.au/ntyouthjustice .
Yu luk that najamob peipa garra dijan leda. Thatlot peipa garrim mo bla dijan stori.
Dismob loiya nomo dalimbat laiya. Yu gin luk la Federal Court websait ya: https://www.comcourts.gov.au/file/Federal/P/NTD64/2016/actions en luk dijan stori im trubalawan.
Dijan stori bin gamat la nyus du. Trai luk dijan iya: Former Don Dale youth inmates to share $35m settlement for mistreatment while in prison (The Guardian, Julai 28, 2021): https://www.theguardian.com/australia-news/2021/jul/28/former-don-dale-youth-inmates-to-share-35m-settlement-for-mistreatment-while-in-prison
Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.