Kids Own Publishing im wanbala oginaiseishin hu meigimbat buk gada biginini mob. Alabat gu la difrendifren skul ebriweya la Ostreiliya en alabat bin meigim kapula Kriol buk du! Det dubala buk gulum Du Matj Bets en RibaBoi . Ola kid bin meigim dis tubala buk alabat self! Det skul la Beswick bin wek gada det At Senta gulum Djilipn Arts en gada wanbala leidi neim Jenny Ellis hu sabi hau bla meigim papitmob.

RibaBoi im brom 2013 wen dei bin dum wanbala proujek la Beswick gada papitmob. Dei bin deigimbat fotomob bla detmob papit en brom deya dei bin meigim det stori na. Detmob la Kids Own Publishing bin dum thri kainoba buk - wanbala gada Ingglish, najawan gada Kriol en najawan olawei brom Rembarrnga. Det Kriol wan im nomo garrim Ingglish wansaid. Dijan im album pipul hu lenlen hau bla rid Kriol gudwei. Iya det websait weya yu gin luk mowa pitja bla det buk en baiyim du.

Du Matj Bets im brom 2016 afta Beswick Skul en Beswick mob bin dum najawan proujek gada detmob papitmob. Dei bin meigim nyuwan stori na - dijan im bla ola flaiyingfoks weya dei oldei gaman-gaman en hambag la Beswick. Du Matj Bets im garrim Ingglish en Kriol mijimet olawei. Yu gin baiyim det seimwan buk bat garrim Ingglish olawei . Yu gin luk det buk en baiyim iya.

Bla gajim det tubala buk, yu gin baiyim brom Kids Own Publishing en wanbala buk im kos $16.50.