La 2017, sambala wumen brom Binjari (gulijap la Katherrain), bin stat dumbat dijan Binjari Buk proujek. Dei bin wek gada wanbala linggwis neim Dinis Enjelo en detmob la Indigenous Literacy Foundation (ILF). Dei bin meigim nainbala buk! Dei bin jinggabat brabliwei wotkain buk bla meigim. Dei bin meigim thribala buk bla beibimob weya ola peij laigi kadbod. Dei bin meigim thribala buk bla lilwan biginini la skul gada braitwan pitjamob en dei bin meigim thribala buk bla bigwan biginini weya det stori im longwan lilbit.

Dumaji detmob la Indigenous Literacy Foundationbin jeya albumat ola Binjari mob olawei, dei bin gon on en gibit loda kopi la ol difrendifren komunidi weya dei tok Kriol. Wanbala buk, Moli Det Bigibigi, enibodi gin baiyim la shop o brom ILF. En la 2019 dei bin pik det buk bla det Australian Reading Hour (yu gin rid mowa bla tharran iya). Ola buk detmob la Binjari bin meigim im:

Hadwan buk bla beibimob (Bod buk)

• Ola namba en kala (Numbers and Colours, brom Bernadine Booth)
• Olkainawan kalawan loli (Lollies of Different Colours, brom Milly Raymond)
• Yakai! Beibigel! (Oh No! Baby Girl!, brom Maureen Hodgson)

Pitja buk bla lilwan biginini

• Moli det bigibigi (Molly the Pig, brom Karen Manbulloo)
• Tudei en longtaim (Now and Then, brom Stella Raymond)
• Fishing—lenimbat ola biginini (Fishing—Teaching Children, brom Marilyn Frith)

Longwan stori bla bigwan biginini

• Roki det kenggurru (Rocky the Kangaroo, brom Maureen Hodgson)
• Hanting gada biliken (Hunting with Billycans, brom Maureen Hodgson)
• Hanting gada trekta en treila (Hunting with a Tractor and Trailer, brom Maureen Hodgson)

Detmob la Indigenous Literacy Foundation brabli kainbala en alabat gibit dismob buk friwan la difren skul en oganaiseishin weya ebribodi tok Kriol. Dei bin kainbala la mela du en gibit sambala buk la mela iya la Meigim Kriol Strongbala en mela yusum detmob buk olataim wen mela dum treining en skul klas la Ropa. Bigininimob en mamimob laigim dismob buk! If yu wandim kopi, tok la detmob la ILF en dei gin jendim bukmob la yu. Gu la: https://www.indigenousliteracyfoundation.org.au

Bla rid mowa stori bla ola Binjari Buk:

• Stori bla ola titja hu wandi yusum Moli Det Biginini la klasrum: https://www.indigenousliteracyfoundation.org.au/site/user-assets/docs/WhyisMoliWritteninKriol_Final.pdf 
• Stori brom wen ola Binjari Buk bin kamat (brom ILF): https://www.indigenousliteracyfoundation.org.au/news-events/binjari-buks-launched
• Stori: ‘Speak their language: reflecting on the ILF Binjari Buks project’ (Books + Publishing websait): https://www.booksandpublishing.com.au/articles/2018/01/17/100158/speak-their-language-reflecting-on-the-ilf-binjari-buks-project/
• Stori: ‘Binjari Book buzz: Kriol stories shared in community’ (NITV websait): https://www.sbs.com.au/nitv/nitv-news/article/2017/12/19/binjari-book-buzz-kriol-stories-shared-community

Thenggyu la Dinis Enjelo bla album mela bla dijan stori.