Tudei en longtaim

Tudei en longtaim im gudwan stori brom Stella Raymond brom Binjari. Im meigim wi jinggabat olpipul mob en hau olabat yustu lib en hau wi lib na tudei. Wen yu rid dijan buk, wan peij im tok bla hau wi lib tudei laik baiyimbat daga la Woolis o draibumbat modiga en den neks peij im tok bla wanim olpipulmob bin du - futwok ebriweya en gu hanting bla daga la bush. Gada loda gudwangudwan pitja, Tudei en longtaim im gudwan stori en im album biginini en femilimob du, jinggabat olabat laif en olpipulmob en det histri bla blekbala.

Tudei en longtaim imin gaman brom det projek brom Indigenous Literacy Foundation, gulum Binjari Buk projek (weya dei bin meigim det najawan buk Moli det bigibigidu). Dijan buk im bla enibodi bla baiyim na, dumaji pipul bin laigim dijan buk brabliwei. Im garram Kriol en Ingglish la ebri peij en so ebribodi garra laigim dijan buk - blekbala en munanga du.

Stori bla det sambodi hu bin raidim dijan buk

Stella Raymond im jidan la Binjari, wanbala lilwan komuniti gulijap la Katherrain. Maitbi 200 pipul lib ja, en mosli dei tok Kriol. Stella bin raidim im buk wen det Indigenous Literacy Foundation bin abum wekshop gada det linggwis Denise Angelo en raita en atis Julie Haysom.