Mela bin irrim gud nyus stori na. La Matj 2021, wanbala nyuwan Kriol buk garra gamat en mela atjamp bla luk.

Main Abija im bla Karen oun stori bla im oun abija. Karen imin wek la Ngukurr Arts longtaim dumbat peinting - en imin rait buk na du! La det buk Main Abija, Karen im dalim stori bla im abija, laik wanim det olmen bin larnim im, wotfo imin importin olmen la im en wanim im laik wen yu garrim importin olpipul la yu laif. Det wed 'abija', ola Ropa mob yusum det wed. Yu abija im bla yu mami dedi.

‘Dijan buk gada ola memri ai bin abum gada main abija from wen ai bin lilgel til imin libu wi. Imin titjim mi loda tings bla koltja en bla kantri. Mi hepi ba pasim det stori la main femili en bla pudum la dis buk.’

.

Karen bin dum ola pitja du en dei brabli purdiwan. Imin wek la Ngukurr Arts longtaim na en imin dum atis kos la Batchelor du. (Yu gin luk ol im peinting en wek brom Ngukurr Arts iya). Dumaji im olredi sabi peinting en drodrobat, imin maitbi isi bla im bla jinggabat meigim buk bla biginini. Det buk im gada Kriol en Ingglish mijimet la ebri peij en ola atwek brom Karen du la ebri peij.

Main Abija garra gamat Matj 2021. Im gamat brom det buk kampani gulum Allen & Unwin so im garra bi la ola bukshop ebriweya en mela garra abum sambala kopi iya la Meigim Kriol Strongbala du so pipul gin baiyim brom mela du. Det buk kampani, Allen & Unwin, alabat na bin dum det buk bla mela, Bigismob Jigiwan Dogbin gamat. Im Kriol trensleishin bla det Ingglish buk Too Many Cheeky Dogsso im meigim mela gudbinji bla luk bigwan buk kampani jinggabat bla meigim buk gada blekbala langgus.

Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.