Mela jandim bigiswan thenggyu la Ned Lander Media dumaji det tubala stori mela bin meigim bla Lil J en Big Kas gada Kriol - yu gin luk la YouTube na!
Afta mela bin abum det "world premiere" las yiya la Ropa, det tubala stori mela bin meigim, Ropamob bin luk loda taim na. En kapula taim dei bin kamat la SBS on Demand en ABC iView du. Bat tudei, dumaji detmob hu meigim Lil J en Big Kas bin larram wi, yu gin luk la mela YouTube peij na, so na ebribodi gin luk det tubala katun. En mela bin pudum det sabtaitul du andanith so yu gin rid wanim dei toktok la det katun du.
Det feswan stori im kol Bigiswan Trip la Riba (gada Ingglish im kol "Big River Adventure). La det stori, Big Kas im bidiyobat nyus ripot bla skul en im gada najamob biginini gu la riba gada Anggul Mik en Old Dog en dei bin deigim det dolidoli Eren du. Bla luk wanim hepin wen detmob gu la riba, yu gin luk holbit det stori iya:
Det sekenwan katun mela bin meigimbat im kol Sineik Ai, en dijan im kol "Serpent's Eye" gada Ingglish. Dijan stori im la skul wen ebribodi bin go med bla mabul. Ola bigwan biginini nomo larram Lil J en Libai plei mabul, so dubala go abum fan misal. Bat Big Kas im wori nobodi laigim im dumaji im winwin ola mabul! Yu gin luk dijanwan stori iya:
En dei bin meigim lilwan ad bla dijan stori du, en yu gin luk bigininimob brom Ropa pleiplei mabul deya, jis laik detmob la det katun!
Melabat iya la Meigim Kriol Strongbala bin wek gada Ngukurr Skul bla transleitim det tubala stori la Kriol. Ola Kriol wed bin gaman brom sambala dijmawan bigwan sjudent. Detmob sjudent bin jinggabat gudwei hau biginini tok gija en dei meigim sut na detmob Kriol wed. Yu gin rid mowa stori bla det projek la dijan stori la Teacher megasin: https://www.teachermagazine.com/au_en/articles/indigenous-translation-project-from-the-classroom-to-the-screen
‘When I read their translations, it was like being a little kid again. I felt like a little kid. It was just so great!’ – Angelina Joshua (Big Cuz), Teacher Magazine
Afta mela bin trensleitim ola wed, det neks pat bin dumbat ola rikoding. Bla dumbat dis pat, Savage Films bin gu la Ropa bla tu wik bla lugubat ola raitwan pipul bla tok bla ola kerekta en rikodimbat mijel. Gudweiwan na bla luk Ropamob yusumbat dis Kriol bla meigim samting brabli gudwan. En dei bin bulrumbat sambala feimiswan blekbala ekta laik Deborah Mailman, Miranda Tapsell en Shari Sebbens - detmob hu toktok la dis katun la det Ingglishwan. Yu gin luk dijan gudwan bidiyo brom detaim mela bin meigimbat dis katun la Ropa:
En yu gin irrim det menija bla Meigim Kriol Strongbala Greg Dickson toktok bla dis projek la ABC Darwin iya.
Iya na ola neim bla ola pipul brom Ropa hu bin album meigimbat Lil J en Big Kas gada Kriol:
Ola trensleita:: Tenille Farrell, Shianiata Tapau, Solomon Tapau, Amber-Rose Dhammarandji, Waylon Huddleston, Ivy Thompson, Larry Burarrwgna, Zacquasha Gumbula, Maylene Rogers, Tahlana Thompson, Tiffany Tipakalippa
Ola Ekta:
Big Kas - Angelina Joshua
Lil J - Sarah Silver
Libai - Shania Miller
Gagu - Carol Robertson
Ol Dog - Bobby Nunggumajbarr
Anggul Mik - Euan Andrews
Eli - Tahlana Thompson
Monti – Aleik Roberts
Sisi - Marlene Andrews
Di - Tenille Farrell
Jekou - Kieran Thompson
Joj - Fred Nunggumadbarr
Mis Tjen - Vivien Dunn
Sineik - Kamahi Djordon King
Mela laigim dis tubala katun brabliwei en mela wish yumob laigim du!
Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.