Ola mami, weka en beibi la Ngukurr FaFT (Femilies as Feswan Titja) bin kipgon dumbat lorra gud wek garrim Meigim Kriol Strongbala dis yiya. Las yiya, thei bin trensleitim sambala buk la Kriol. Thei bin iben jandap en dum lil roulplei bla det buk Det Brabli Jigibala Beya wen det Ejukeishin Minista, Selena Uibo, bin gaman bla bisit.

Dis yiya, ola mami en weka la Ngukurr FaFT bin stat dumbat song na. Imin rili gud en ola mami en beibi laigim detmob song. Thei bin pik tubala gudwan song burrum Ingglish, gulum I Had A Little Turtle en Open, Shut Themen thei bin pudum la Kriol na. Detmob mami en weka bin singsing det tubala song la bidiyo bla wi:

Iya na ola wed bla det song Tainiwan Tetul:

Ai bin abum lilwan tetul, bla im neim bin Taini Tim
Ai bin pudum im langa woda bla luk if im gin swim
Imin dringgim ola woda en dagat-dagat sop
En na im ardim binji garram murriny la im throut
Murriny, murriny, murriny, murriny, murriny, murriny
Murriny, murriny, murriny, murriny, murriny, BAS!

Dei bin pudum det wed 'murriny' jeya insted ob 'babul'. Det wed 'murriny', Ropamob yusum wen yu la bilibong o riba en yu luk det babul la wada. Im jis rait bla pudum det wed jeya la det song.

Det najawan song dei bin laigim singsing la Ngukurr FaFT im Open, Shut Them. Trai luk hau thei dum gada Kriol:

Iya ola wed:

Opinim, shatimap, opinim, shatimap, gibit lilwan klep klep klep
Opinim, shatimap, opinim, shatimap, meigim im leidan la yu lep
Jinigap, jinigap, jinigap, jinigap, raitap la yu tjin
Opinim ap yu lilwan mawus, bat nomo larrim im guwin
Sheigim im, sheigim im, sheigim im, sheigim im sheigim im lagijat na
Rolimap, rolimap, rolimap, rolimap – upa upa na … UPA!

Detmob la Ngukurr FaFT hepi bla shoum yumob dismob song. Dei jinggabat maitbi najamob wandi luk la najamob komunidi en najamob gin singsing dismob song du. Thenggyu la ebribodi la Ngukurr FaFt, speshili Mailin, Sera, Kerolain en Murisa.

Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.