Bla Carol Roberston feswan buk bin jis gamat. Im kol Stori bla Brutbrut en Bujigat en imin kamat brom detmob la Indigenous Literacy Foundation.

Det Carol im album meigim difrendifrenwan buk bla Kriol spika. Imin album brabliwei wen dei bin meigim det Kriol Baibul . Imin luk la ola trensleishin detmob ola Baibul trensleida bin dum en imin meiksho dei bin dum raitwei. Brom deya, la 2020, detmob la Allen & Unwin bin meigim Kriol buk wen dei bin gajim det Inggilish buk Too Many Cheeky Dogs brom Dion Beasley en Johanna Bell en pudum la Kriol. La det buk, Carol bin album trensleidimbat la Kriol en imin gamat na garram nyuwan neim - Bigismob Jigiwan Dog . Carol bin albumbat brabliwei du, bla meigim det Kriol Preya Buk wen imin gamat la 2021 afta 23 Kriol trensleida bin wek bla 10 yiya la det buk.

Stori bla Brutbrut en Bujigatim det feswan buk Carol bin rait imself so mela bin askim im sambala kwesjin gada Kriol bla im nyuwan buk...

Wanim bin meigim yu jinggabat rait dijan stori? .

Wal aibin jinggabat bla rait stori olataim, bat ai nomo bin sabi la hu ai gin gu o hu gin album mi. Dijan stori aibin rait blanga bigininimob la skul en la kemp. Iya langa Ngukurr komuniti melabat tok onli Kriol. Melabat bin lostim mela langgus longtaim. Melabat bin onli tok Kriol feswan langgus en Inggilish en nomo bin lau tok melabat langgus la skul. Aibin rait dijan stori bla brutbrut en bujigat dumaji aibin oldei lukinatbat det katun pitja Tom en Jerry

.

Wanim yu laigiim garra hepin na garram yu buk? Hu yu wandim garra rid yu buk? .

Ai wandim ebribodi garra rid dijan stori langa bigininimob la kemp. Titjamob la skul du gin lenim bigininimob bla ridim dijan stori.

.

Yu jinggabat raitim najawan buk? .

Mi wandim raitimdan mowa buk lagijat, blanga enimulmob, berdmob en fishmob. Maitbi yumob du garram stori!

.

Wanim yu reken bla ola pitja Karen bin dum? .

Brabli gudwan! Dumaji ai sabi Karen dro brabli gudwei en aibin luk ol im peinting la Art Centre. Bla tharran na aibin askim im bla dum ola pitja bla dijan buk.

.

Wanim “brutbrut”? ..

La Inggilish im ‘mouse’. Melabat kolim ‘brutbrut’ la Kriol. Langa ebri haus yu gin faindim brutbrut. Langa bush du en insaid trak, hil kantri en plein kantri.

.

Stori bla Brutbrut en Bujigat yu gin baiyim tudei (Hardcover, $24.99) brom ola bukshop en brom mela onlain shop! 

Yu laigim luk dijan stori gada Inggalish?
Klikim det 'English' batin jeya antap bla luk dijan seim websait bat olawei gada Inggalish.