ABC bin katimbek Nyus gada Kriol

ABC bin tjeinjim na so yu kaan irrim nyus gada langgus eberri dei (Mandei raitap Fraidei). Im oni eberri wans a wik na. Dijan bin hepin la det thribala langgus: Yolngu Matha, Warlpiri en Kriol.

Mela bin nogudbinji wen mela bin faindat thei bin tjeinjim. Mela askim ABC bla kipgon sapotimbat Kriol en gibit nyus eberri dei la ola Kriol spika dumaji mela bigismob iya la NT.

Det ‘Nyus Gada Langgus’ weya ABC dumbat bin stat 2015. Thei bin dum eberri Mandei raitap Fraidei gada Yolngu Matha en Warlpiri. Wen thei bin statim, det Charlie King bin tok::

“Dis Nyus Gada Langgus, mela testimat im en im sut gudwei la det Reconciliation Ekshin Plen mela garram iya la ABC. Dijan Nyus Gada Langgus gibit tjens bla mowa pipul bla irrim ABC Nyus en dijan im gudwan dumaji ABC Nyus im gudweiwan en feyawan. Im album loda blekbala hu jidan la komunidi ol oba la NT hu nomo oldei tok Ingglish la kemp”.

Afta na, la 2016, thei bin stat dumbat nyus gada Kriol du en imin det namba thri langgus thei bin pudum la det ‘Nyus Gada Langgus’. Thei oldei pudum det nyus la ABC websait en la Soundcloud websait. Enibodi gin gajim det rikoding brom Soundcloud en maitbi pleiyim la BRACS o la Komunidi Reidiyo. Det Nyus Gada Langgus bin oldei kamat la ABC Radio du bat luk laik najing na.

Kapula manth bek, thei bin tjeinjim det Nyus. Imin gulijap eberri dei bat im onli eberri wans a wik na. Dijan bin hepin nomeda pipul bin tok nomo naf nyus en infameishin kamat la blekbala gada blekbala langgus, laik wen Saikloun Trevor bin gaman dis yiya. Pipul bin tok det taim, im brabli impotant blekbala gin gajim nyus gada langgus streitawei. Thei bin katimbek Nyus Gada Langgus du, nomeda thei bin gulum dis yiya ‘International Yiya bla ola Blekbala Langgus’.

Sambala askimbat wotfo thei bin katimbek Nyus Gada Langgus, laik Vicki Kerrigan hu yustu wek la ABC Radio la Darwin and Christopher Smyth hu yustu bi boswan bla ola ABC iya la NT. Bat nobodi sabi brabli wotfo thei bin katimbek Nyus Gada Langgus.

 

Iya la NT, sambala bin tok wi losimbat loda langgus. Loda pipul sabi, if yu wandim langgus bla jidan strongbalawei, det langgus garra kamat ebriweya, la nyus du.

Bulurum Mela

Scroll to Top
Gubek la top